ក្រុងប៉ារីស: ប្រាកដណាស់ ខិតខំធ្វើការខ្លាំងពេកនាំឲ្យកើតអារម្មណ៍ចង់ផឹកគ្រឿងស្រវឹង។ នេះជាការលើកឡើង កាលពីថ្ងៃពុធ ដោយក្រុមអ្នកស្រាវជ្រាវដែលព្រមានពីហានិភ័យចំពោះសុខភាពនៃទំនាក់ទំនងទាំងពីរនេះ។
ពួកគេបាននិយាយថា ការវិភាគមួយចំណោមការសិក្សាជាច្រើនលើមនុស្សជាង៤០ម៉ឺននាក់ បានបង្ហាញថា អ្នកដែលធ្វើលើសពី ៤៨ ម៉ោងក្នុងមួយសប្ដាហ៍ ជាវេលាបំពេញការងារអប្បរមានៅអឺរ៉ុប ទំនងជានាំឲ្យចិត្ដចង់ផឹកគ្រឿងស្រវឹងច្រើនប្រកបដោយគ្រោះថ្នាក់ចំពោះសុខភាព។
អត្ថបទចុះផ្សាយក្នុងទស្សនាវដ្ដី BMJ បានរាយការណ៍ថា ការបំពេញការងារច្រើនម៉ោងបង្កើតចំណង់ផឹកគ្រឿងស្រវឹងច្រើនរហូតដល់១១ភាគរយ។
អ្នកធ្វើការចាប់ពី ៤៩ ទៅ ៥៤ម៉ោង ក្នុងមួយសប្ដាហ៍មានហានិភ័យ១៣ភាគរយ បើធៀបនឹងអ្នកដែលធ្វើការងារត្រឹមតែ ៣៥ ទៅ ៤០ម៉ោងក្នុងមួយសប្ដាហ៍។ អ្នកធ្វើការចាប់ពី ៥៥ ម៉ោង ឬក៏ច្រើនជាងនេះជួបហានិភ័យលើសអ្នកខាងលើ ១២ភាគរយ។
ទម្លាប់ផឹកគ្រឿងស្រវឹងដល់កម្រិតគ្រោះថ្នាក់ត្រូវកំណត់ថា លើស១៤រង្វាស់ជាតិអាកុលស្ដង់ដារក្នុង១សប្ដាហ៍សម្រាប់ស្ដ្រី និងច្រើនជាង ២១ រង្វាស់ជាតិអាកុលដែលប្រឈមគ្រោះថ្នាក់ចំពោះសុខភាពខ្ពស់ ដូចជា ជំងឺថ្លើម បេះដូង មហារីក ដាច់សរសៃឈាម និងផ្លូវចិត្ដ។
រង្វាស់ស្ដង់ដារនៃសារធាតុអាកុល ១កម្រិត មានចំនួនស្មើនឹង១ភាគ៣នៃស្រាបៀរកម្រិតអាកុលមធ្យម១កំប៉ុង ៨៧មិល្លីលីត្រនៃស្រាក្រហម មានជាតិអាកុល ១២ ភាគរយ ឬក៏វីស្គី ២៥ មិល្លីលីត្រ៕
ប្រភព៖ www.postkhmer.com
