ក្រុងប៉ារីសៈ បើយោងតាមការចុះផ្សាយរបស់ព្រឹត្តិបត្រសារព័ត៌មានសុខភាពពិសេស មួយកាលពីថ្ងៃចន្ទបានឲ្យដឹងថា ពន្លឺព្រះអាទិត្យមានគុណប្រយោជន៍ជួយកាត់បន្ថយគ្រោះថ្នាក់នៃជំងឺ លើសឈាម ឬឡើងសម្ពាធឈាមបាន ខណៈជំងឺនេះជាដើមចមដ៏គ្រោះថ្នាក់នាំឲ្យគាំងបេះដូង និងដាច់សរសៃឈាមខួរក្បាល។
លោក ម៉ាទីន ហ្វីលីសច៍ សាស្រ្តាចារ្យផ្នែកឱសថសាស្រ្តនៃសាកលវិទ្យាល័យសោតហេមតុន ប្រទេសអង់គ្លេសបានរកឃើញកម្រិតប្រែប្រួលរបស់ពន្លឺព្រះអាទិត្យ ដោយសារវត្តមាននៃសារធាតុគីមីនីទ្រិចអុកស៊ីត ឬ អាសូតអុកស៊ីត(NO) នៅលើស្បែកមនុស្ស។ សារធាតុគីមីនេះវាបានពង្រីកខ្លួនតាមសរសៃឈាមមនុស្ស ហើយមានមុខងារសំខាន់មួយធ្វើឲ្យសម្ពាធឈាមថយចុះបាន។
អ្នកជំងឺលើសឈាមច្រើនប្រឈមនឹងគ្រោះថ្នាក់នៅរដូវរងា ជាពិសេសគឺប្រជាជនទាំងឡាយណាដែលមិនសូវប៉ះពន្លឺព្រះអាទិត្យ។
លោក ម៉ាទីន ហ្វីលីសច៍ បន្ថែមថា៖ «មនុស្សជាច្រើនខ្លាចខូចស្បែកពេលត្រូវពន្លឺព្រះអាទិត្យ តែតាមពិតការមិនឲ្យស្បែកត្រូវកាំរស្មីថ្ងៃនោះ វាបង្កើនគ្រោះថ្នាក់ខ្លាំងដល់ជំងឺសរសៃឈាមនានាទៅវិញទេ»៕
ប្រភព៖ www.postkhmer.com
