ក្រុងម៉ៃអាមី: ក្រុមអ្នកស្រាវជ្រាវអាមេរិក និយាយកាលពីថ្ងៃចន្ទថា អ្នកដែលមិនបានគេងគ្រប់គ្រាន់ ប្រឈមនឹងជំងឺផ្ដាស្ដាយខ្ពស់ជាង ៤ ដងធៀបនឹងអ្នកគេងបរិបូរណ៍។
លទ្ធផលផ្សាយក្នុងទស្សនាវដ្ដីដំណេក គឺផ្អែកលើការសិក្សាពីក្រុមអ្នកស្ម័គ្រចិត្ត ១៦៤ នាក់ ដោយសុខចិត្តចម្លងជំងឺផ្ដាសាយ និងឲ្យក្រុមស្រាវជ្រាវតាមដានអំពីដំណេក។
លទ្ធផលបានបង្ហាញថា អ្នកគេងតិចជាង ៦ ម៉ោងក្នុងមួយរាត្រីពេញមួយសប្ដាហ៍ ប្រឈមហានិភ័យជំងឺផ្ដាសាយដល់ ៤,២ ដងបើធៀបនឹងអ្នកដែលគេងលើសពី ៧ ម៉ោង។
អ្នកគេងតិចជាង ៥ ម៉ោងក្នុងមួយរាត្រី កាន់តែងាយកើតជំងឺផ្ដាសាយដល់ ៤,៥ ដង។
វេជ្ជបណ្ឌិត អារិក ប្រាធ័រ ជំនួយការសាស្ដ្រាចារ្យផ្នែកជំងឺចិត្តសាស្រ្ដនៃសាកលវិទ្យាល័យកាលីហ្វ័រនីញ៉ានៃរដ្ឋសានហ្រ្វានស៊ីស្កូ និងជាអ្នកដឹកនាំការសិក្សា ថា៖ «វាមិនពាក់ព័ន្ធនឹងវ័យ កម្រិតស្រ្ដេស ជាតិសាសន៍ ការអប់រំ ឬចំណូលរបស់ពួកគេទេ។ វាមិនបញ្ហាទេ បើពួកគេជាអ្នកជក់បារីឬអត់នោះ។ សំខាន់ ដំណេកស្កប់ស្កល់នៅតែមានប្រសិទ្ធភាពចំពោះសុខភាព»។
ការសិក្សាជាច្រើនបានភ្ជាប់កង្វះដំណេកទៅនឹងជំងឺរ៉ាំរ៉ៃ ការស្លាប់មុនអាយុ ងាយឆ្លងរោគ គ្រោះថ្នាក់រថយន្ដ ជំងឺពាក់ព័ន្ធនឹងការងារ និងឱសថគ្មានប្រសិទ្ធភាព៕
ប្រភព៖ www.postkhmer.com
