ការស្រាវជ្រាវរកឃើញថា កុមារដែលញ៉ាំអាហារទាន់ចិត្ដច្រើនបំផុតទំនងជាមានពិន្ទុគណិតវិទ្យា វិទ្យាសាស្ដ្រ និងការអានអក្សរទាប។
ទ្រឹស្ដីមួយបានស្នើដោយក្រុមអ្នកស្រាវជ្រាវថា កង្វះជាតិដែកនាំឲ្យបន្ថយការវិវឌ្ឍនៃដំណើរការក្នុងខួរក្បាល។ គំនិតមួយផ្សេងទៀតបានលើកឡើងថា អាហារដូចជា ហេមប៊ឺហ្គើរ ដំឡូងបារាំង និងមាន់បំពង ជាដើមនោះសម្បូរជាតិខ្លាញ់ និងស្ករមានផលអវិជ្ជមានទៅលើដំណើរការនៃការរៀនសូត្រ។
ការស្រាវជ្រាវបានប្រើទិន្នន័យមកពីលទ្ធផលនៃការសិក្សាលើកុមារ៨៥០០នាក់ នៅសហរដ្ឋអាមេរិកដែលញ៉ាំអាហារទាន់ចិត្ដជាប្រចាំរហូតដល់អាយុមុន១០ឆ្នាំ។
ក្នុងន័យវិទ្យាសាស្ដ្រ កុមារដែលញ៉ាំអាហារទាន់ចិត្តរាល់ថ្ងៃ ជាមធ្យមបាន៧៩ពិន្ទុ បើធៀបនឹង៨៣ពិន្ទុចំពោះអ្នកមិនធ្លាប់ញ៉ាំអាហារទាន់ចិត្ដ។
អ្នកស្រីវេជ្ជបណ្ឌិត ខេលលី ភើតេល (Dr Kelly Purtell) ដែលបានដឹកនាំការសិក្សានៅសាកលវិទ្យាល័យរដ្ឋអូហាយ៉ូ បាននិយាយថា៖ «ការសិក្សាបានផ្ដល់ភ័ស្ដុតាងបញ្ជាក់ថា ការទទួលទានអាហារទាន់ចិត្ដក្រៅពីពាក់ព័ន្ធនឹងការឡើងទម្ងន់ វាក៏បង្កបញ្ហាប្រឈមផ្សេងទៀតដូចជា លទ្ធផលការសិក្សាខ្សោយ»៕
ប្រភព៖ www.postkhmer.com
