ក្រុងវ៉ាស៊ីនតោន: ស្ត្រីដែលទទួលទានមីស្រុសយ៉ាងតិច២ដងក្នុងមួយសប្ដាហ៍ប្រឈមនឹងអត្រាកើតជំងឺលើសសម្ពាធឈាម លើសជាតិស្ករក្នុងឈាម និងជាតិកូឡេស្តេរ៉ូលខ្ពស់។ នេះបើយោងតាមក្រុមអ្នកស្រាវជ្រាវអាមេរិកបានប្រកាសកាលពីថ្មីៗនេះ។
ការសិក្សាបានពិនិត្យលើទិន្នន័យមនុស្សពេញវ័យទាំងស្រីទាំងប្រុសជនជាតិកូរ៉េ១០៧១១នាក់។ ក្រុមអ្នកស្រាវជ្រាវនៅសាកលវិទ្យាល័យហាវើតដ៏ល្បីល្បាញក្នុងពិភពលោកមួយនេះបានរកឃើញថា ៦៨ភាគរយនៃស្ត្រីដែលទទួលទានមីស្រុសលើសពី២ដងក្នុងមួយសប្ដាហ៍ប្រឈមនឹងអត្រាគ្រោះថ្នាក់ផ្នែកប្រព័ន្ធរំលាយអាហារ។
បញ្ហាប្រព័ន្ធរំលាយអាហារនេះរួមចំណែកធ្វើឲ្យពួកគេកើតជំងឺបេះដូង ទឹកនោមផ្អែម និងមានខ្លាញ់ច្រើននៅបរិវេណជុំវិញចង្កេះ។ ផលអវិជ្ជមាននេះកើតឡើងចំពោះស្ត្រីភាគច្រើនជាជាងបុរស។
លោកសាស្ត្រាចារ្យ ហ្វ្រេង ហ្វូ អ្នកជំនាញផ្នែកអាហារ និងសុខភាពនៅសាកលវិទ្យាល័យនេះ បានបញ្ជាក់ទៀតថា៖ «ការទទួលទានមីស្រុសម្ដង ឬក៏២ដងក្នុងមួយខែវាគ្មានបញ្ហាទេ តែការញ៉ាំវាពីរបីដងក្នុងមួយសប្ដាហ៍ពិតជាប៉ះពាល់ដល់សុខភាព ជាពិសេសស្ត្រីតែម្ដង»៕
ប្រភព៖ www.postkhmer.com
