ការសិក្សាជាអន្ដរជាតិរបស់មូលនិធិដំណេកជាតិអាមេរិក បានឲ្យដឹងថា មនុស្សពេញវ័យម្នាក់ក្នុងចំណោម ៣នាក់មានទម្លាប់គេងស្រាត ហើយទង្វើនេះមានគុណប្រយោជន៍ច្រើនចំពោះសុខភាព។
ក្រុមអ្នកជំនាញសន្និដ្ឋានថាដំណេកននលគកអាចបង្កើនគុណភាពដំណេកបានលក់ស្កប់ស្កល់ ជួយដុតកាឡូរី និងជួយជំរុញទំនាក់ទំនងឲ្យកាន់តែស្អិតល្មួតផងដែរ។
គេងស្រាតស្មើនឹងដំណេកដ៏លង់លក់ពេលរាត្រី
គុណប្រយោជន៍នៃដំណេកស្រាតគឺវាបានជួយបន្ធូរភាពតានតឹង និងផ្ដល់ភាពត្រជាក់ដល់រាងកាយ ព្រមទាំងរក្សាសីតុណ្ហភាពសមល្មមសម្រាប់ខួរក្បាល។
ការរំខានដំណេកដោយសារតែអាកាសធាតុក្ដៅពេកមិនត្រឹមតែមានន័យថា លោកអ្នកដេកបានតិចប៉ុណ្ណោះទេ ប៉ុន្ដែថែមទាំងអាចគេងមិនពេញភ្នែកទៀតផង។
គេងននលគកដើម្បីកម្ចាត់កាឡូរីឥតបានការ
អ្នកដែលមានអារម្មណ៍ស្អុះស្អាប់ពេលរាត្រី និងចង់គេងស្រាត អាចមានសារធាតុខ្លាញ់ពណ៌ត្នោតច្រើនដែលធ្វើឲ្យពួកគេមានអារម្មណ៍កក់ក្ដៅជាងអ្នកដទៃ។
ខណៈពេលខ្លាញ់ពណ៌ត្នោត ដែលជាពពួកខ្លាញ់ល្អក្នុងរាងកាយនោះមានកាន់តែកើនច្រើន ពេលយើងទទួលទានអាហារមានកាឡូរីលើសធម្មតា ខ្លាញ់ពណ៌ត្នោតនោះអាចដុតបំផ្លាញកាឡូរីដែលលើស និងជួយរក្សាសីតុណ្ហភាពរាងកាយឲ្យប្រក្រតីឡើងវិញ។ ប៉ុន្ដែសីតុណ្ហភាពក្នុងបន្ទប់ក៏មិនគួរបន្ថយឲ្យត្រជាក់ពេករហូតរាងកាយមិនអាចទ្រាំបានផងដែរ មិនដូច្នោះទេលោកអ្នកនឹងមិនអាចគេងលក់ឡើយ។
ជួយបន្ទាបសម្ពាធឈាម
ដៃគូរួមគ្រែក៏អាចជួយរក្សាសីតុណ្ហភាពរាងកាយរបស់លោកអ្នកផងដែរ។
ជាងនេះទៅទៀតការស្រាតអាចជួយប្រមូលផ្ដុំអ័រម៉ូនម៉្យាងឈ្មោះថាអុកស៊ីតូស៊ីន ជាអ័រម៉ូនដែលបង្ហាញពីសុខភាពមាំមួន។ អុកស៊ីតូស៊ីនមានប្រសិទ្ធភាពការពារបេះដូង និងបន្ទាបសម្ពាធឈាម។ វាក៏ជួយជំរុញប្រព័ន្ធស៊ាំ និងបន្ថយការថប់អារម្មណ៍ផងដែរ។
គុណប្រយោជន៍នៃអ័រម៉ូននេះក៏អាស្រ័យលើដៃគូទាំងសងខាងពេញចិត្តក្នុងការគេងស្រាតសាច់ប៉ះសាច់ផងដែរ។
ជំរុញសេចក្ដីស្រឡាញ់កាន់តែផ្អែមល្ហែមយូរអង្វែង
អ្នកជំនាញផ្នែកសិចសាស្ត្របានរកឃើញថា អ្នកដែលគេងអត់ខោអាវមានជីវិតផ្អែមល្ហែមជាមួយដៃគូជាងអ្នកដែលស្លៀកពាក់ខោអាវ។ ការគេងស្រាតគឺជាយុទ្ធសាស្ដ្រដ៏ល្អមួយសម្រាប់អ្នកដែលចូលចិត្តឲ្យដៃគូប៉ះពាល់ខ្លួន។
ឈុតគេងយប់អាចផ្ដល់ជាសារ «មិនមែនយប់នេះ»។ ផ្ទុយទៅវិញការគេងអាក្រាតគឺជាសារបើកភ្លើងខៀវដល់ដៃគូផ្ដើមប្រតិបត្តិការ។
បញ្ឈប់ជំងឺឆ្លង
គេងអត់ស្លៀកពាក់អ្វីសោះអាចជួយស្ដ្រីពីការផ្អាប់ទុកនូវជំងឺឆ្លងនានា ដូចជាបញ្ហាស្អុយនៅក្នុងប្រដាប់ភេទជាដើម។ មេរោគស្អុយច្រើនកកើតនៅទីកន្លែងក្ដៅឧណ្ហៗ ពិសេសតំបន់កន្លុកកន្លៀត។ ដូច្នេះការស្លៀកពាក់រលុង ឬខ្លួនទទេស្អាតគឺជាជម្រើសដ៏ល្អ។ បើលោកអ្នកស្លៀកសម្លៀកបំពាក់ចង្អៀត វាមានន័យថា បរិវេណនោះមានខ្យល់ចេញចូលតិចបំផុតដែលធ្វើឲ្យបែកញើសបង្កឲ្យកើតមេរោគបាក់តេរីនានា។
បើលោកអ្នកមិនអាចគេងស្លៀកខ្យល់ដណ្ដប់មេឃ
អ្នកដែលអៀនក្នុងការគេងស្រាត សូមជ្រើសរើសឈុតគេងរលុង។ អំបោះធម្មជាតិ ដូចជា រោមចៀម កប្បាស ឬសូត្រមានសំណើម និងរន្ធខ្យល់ធ្វើឲ្យរាងកាយមិនក្ដៅហប់ ព្រមទាំងមានអារម្មណ៍សុខស្រួល។
គ្របដងខ្លួន ដៃ និងជើង។ ជំនួយភួយសំឡីក្រាស់ៗមកប្រើភួយស្ដើងដែលអាចបកមួយស្រទាប់ៗចេញនៅពេលដែលអ្នកមានអារម្មណ៍ក្ដៅ។
លោក ម៉ៃ ធីបតុន សាស្ដ្រាចារ្យផ្នែកមនុស្សសាស្ដ្រ និងសរីរាង្គអនុវត្ដនៅសាកលវិទ្យាល័យផតម៉ោស ណែនាំថា៖ «ខោអាវគេងគួរប្រើក្រណាត់ដែលសម្រួលដល់ចរន្តខ្យល់ និងសំណើម ទើបអ្នកអាចគេងបានស្រួល»៕
